اسمها نهلة

اهلا ياجماعة الخير طبعا لكم وحشة كبيرة واكرر شكرى لكم على سؤالكم عليا ودعواتكم ليا
لقيت شوية انتعاش فى الصحة ( وياخوفى يابدران من هذه الانتعاشة) قلت اجى ادردش معاكم فى كام حاجة كده ده طبعا غير البوست
طبعا انتهت 2009 وبدات سنة جديدة  ومن قبلها انتهت السنة الهجرية وطبعا نفسى اقول كلمة للتذكرة
لازم كل واحد فينا يقف وقفة مع نفسه ويعمل كشف محاسبة لنفسه ويحاول الاصلاح فى الخطايا ويكثر من الطاعات ونحاول جاهدين
التقرب الى الله بالاعمال الصالحة وكل من مر به حدث مش كويس او كويس يحمد الله على ماحدث معه وامر المؤمن كله خير

وعاوزة اقول لسارة صاحبة مدونة سارة السعودية شرفتى ونورتى مصر وياريت تكونى انبسطتى وربنا يبارك فى حبايبنا المدونين
اللى رحبوا بيكى وياريت الزيارة تتكرر
وكمان عاوزة اوجه نداء اتوجه بيه الى الابن الغالى المهندس احمد ابو العلا واقوله يعز علينا فراقك يااحمد واحنا عارفين اننا غاليين عليك
ومش حتقدر على بعدنا حنسيبك ترتاح شوية وبعدين ترجع بينا تانى باذن الله

نيجى بقى للبوست وهو كان مفروض يتنشر قبل كده بمدة ولكن معلش ملحوقة
كنت انا وبنتى على موعد فى احدى اماكن تفصيل الملابس( اتيليه) المهم الموعد كان مع صاحبة المكان وكان فيه تاكيد على الميعاد بانها لازم
تكون موجودة هى شخصيا لان ده فستان زفاف ولازم اشرافها هى عليه
عندما ذهبنا وكان الموعد قبل الافطار فى رمضان واننا لانستطيع الذهاب بعد الافطار علشان الصلاة وكده وجدنا صاحبة الاتيليه مش موجودة
رغم تاكيدها انها ستكون موجودة
الموقف طبعا زعلنى وطلبت من البنات الموجودة الاتصال بيها فما كان منها الا الاعتذارلظروف عندها طبعا زعلت وبدات اوجه كلامى للبنات الوجودين
عن احترام المواعيد والالتزام بيها وخاصة لو مكان عمل واثناء زعلى وحدتى فى الكلام فاذا بفتاة من ضمن الفتيات كانت جالسة على ماكينة خياطة تقوم
وتهدأ من روعى وانها ستقوم هى بوضع اللمسات على الفستان مثل صاحبة الاتيليه بالضبط
اظهرت ضيقى وان الرتوش الاخيرة لازم تضعها المدام نفسها اصرت الفتاة الا نخرج زعلانين وقامت واخذت تنفذ ماطلبناه منها من اضافات وكنت انا والحق
يقال متحفزة فى طلباتى انها لن تجيد فعل مانطلبه
لم يطول الامر فبعد فترة بسيطة اكتشفت ان لها لمسة جميلة وانها اضافت اقتراحات زادات من جمال الفستان وكانت لها كلمات رقيقة اخرجتنى مما كنت فيه
وبدات اتجاذب معها الحديث
انتى اسمك ايه ؟ قالت اسمى نهلة
انتى معاكى شهادة يانهلة ( خلوا بالكم نهلة خياطة على ماكينة فى اتيلية من ضمن كثير من الفتيات) وجاءنى ردها المفاجىء
انا معايا ليسانس حقوق وعاملة ماجستير فى القانون الدولى
قلت لها وطبعا علشان قلة الشغل وكده بتشتغلى هنا
وجاءنى ردها بالمضمون الذى اذهلنى
قالت لا انا اشتغلت مع محامى كبير والحمد لله اهلى عندهم امكانية يفتحوا لى مكتب لكن انا بحب هذه المهنة وفى طريقى لفتح اتيليه وانا هنا بتدرب واخد خبرة
قلت لها معقولة واهلك موافقين على كده
قالت لا طبعا والدنيا مقلوبة هما عاوزين طبعا الاستاذة راحت والاستاذة جت وانا بقاوم ولن اتنازل عن هدفى ومشروعى
قلت لها خلى هدفك ومشروعك بعد ممارسة عملك الاساسى واللى اخذتى سنين فى دراسته
قالت اصلا انا دخلت الكلية ارضاء ليهم وعملت الماجستير ارضاء لنفسى ومع ذلك لم استطع التخلى عن حلمى
انتهى حوارنا انا متقمصة دور الاهل والدفاع عن وجهة نظرهم وهى وبنتى متقمصين دور الابناء والدفاع عن امانيهم واحلامهم

وتساءلت كيف لو انا فى هذا الموقف مع بنتى؟

ده انا لما بنتى كانت فى الثانوية وكانت علمى وحصلت على مجموع كبير فى ثانية ثانوى وجاءت فى ثالثة وحولت ادبى لانها
على حد قولها ورغم تفوقها فى العلمى ميولها ادبية اكثر اصابتنى حسرة كبيرة لان كان نفسى تدخل صيدلة
وماذا لو بنتى المهندسة كانت جاءتنى بعد تخرجها وقالت انها ستعمل فى شىء فى غير ماتخصصت علشان هى بتحب هذا الشى
الموضوع انتهى والسؤال عندكم الان
ماذا تفعل لو حدث هذا من احد ابناءك خلوا بالكم فرقوا (السؤال هل تقبل ان يفاجاك ابنك او بنتك فى تغيير المسار بعيد عن دراسته
حتى وان كان تغيير المسار سيجعله فى مجال اخر غير مجاله التعليمى مثل ماحدث من نهلة)
وكمان عاوزاة اعرف راى الشباب او الفتيات وياريت تكون الردود واقعية

تنويه اخير اتمنا منكم جميعا المشاركة فى نشر هذه الحملة ولتكن اول الاعمال الصالحة لنا فى العام الجديد فقد جاءتنى وكعادته دائما
من محمد صاحب مدونة طهر فؤادك وهى عن كفالة اليتيم وطبعا المشترك فى هذه الحملة سواء بالتنويه عنها او بالعمل بما جاء فيها
عارفين الجزاء طبعا حيكون بجوار الحبيب صلى الله عليه وسلم فى الجنة ومش مهم الكفالة بالمال ممكن بكلمة حلوة او بزيارة ولعب معاهم
او بمسحة على روءسهم ادخلوا على هذا الرابط وستجدون تفاصيل اكثر وجعله الله فى ميزان حسناتكم

http://rasoulallah1.blogspot.com/2009/12/blog-post_09.html
ودمتم بالف خير