الواد احمد ابنى واخوه مالك

انا بكتب البوست ده النهاردة واحنا كلنا سهرانين

فى خطوبة دودو عاشقة الرومانسية

سهرانين طبعا معاها بقلوبنا

ربنا يتمم لها بالخير وعقبال الفرح

واقولها :

(( جعله الله لكى كما تحبى وجعلكى له كما يحب وجعلكما معا له كما يحب ويرضى ))

وابدأ فى بوست النهاردة

فى حياة كل منا اشخاص مقربون يحدث بيننا شد وجذب واختلافات وتعصبات حتى تشعر القلوب للحظة ان الجفاء دب فى قلوبنا

كما يحدث احيانا بين الزوجة وزوجها ففى الخلاف تشعر وكأن هذا الشخص يكرهها بل يكاد يكون من أعدائها

وكذلك بين الاباء والابناء والكثير والكثير من المواقف

ولكن تأتى لحظة شدة وألم فتجد هؤلاء هم أقرب الناس إليك وتفيض أعينهم حزنا عليك

وتظهر ألفة القلوب والتى قد تعتقد فى لحظة من اللحظات أنها ذهبت وحلت محلها العدواة

والموقف اللى جايلكم بيه النهاردة برهان على المقدمة اللى فاتت

موقف بينى وبين ابنى احمد هو صحيح الحمد لله رب العالمين ما وصلتش المرحلة بيننا لدرجة الجفاء اللى قلتها فى المقدمة ولكن حالى وحاله

كحال كل الاسر مع شباب هذا الجيل واللى بينهم من شد وجذب

من حوالى شهر كامل لما مر بيا موقف المرض الاخير حصل موقف منه مش قادرة الذاكرة تنساه ابدا وقبل ما احكى الموقف اديكم فكرة عن احمد

هو شاب زى الشباب فى اولى اكاديمية

وبينا شد وجذب على طول

هو دايما معترض وانا دايما ثايرة

وهو معترض على ايه ؟ معترض على صوتى العالى وانا بكلمه

معترض انى عامله وراه مخبر سرى بس مش بطريقة تحرجه ولا حاجة ولكن مثلا اذا اتصل حد من اصدقائه

احاول اعمل معاه حوار بطريقة معينة لعلى اعرف حاجة خفية وطبعا بيوصله الخبر ويبقى بينا مصانع الحداد

معترض على متابعتى له وهو بره دايما بالموبايل وانت فين ومع مين وراجع امتا ؟

معترض على تعليماتى وهو مع اصدقائه ان العربية ما تبقاش على اخر سرعتها لانى مش حمل اى خبر وحش يوصلنى رغم ايمانى بقضاء الله وقدره وهكذا وهكذا

وأنا دايما ثايرة انى الاقيه بيندمج فى الحاجات اللى الشباب بيعملوها اليومين دول

زى اللبس المعين والحاجات دى

هو الصراحة مش مندمج فى المواضيع اياها ولا بيتصرف اى تصرف مثير للشبهات بل بالعكس والحمد لله السجاير والديسكو والهلس اللى بيعمله كتير من الشباب هو ابعد ما يكون عن هذا

وواثقة فى اخلاقه جدا جدا ولكن دايما انا خايفة

المهم انا وهو فى حالة شد دايما لغاية ما فاجأنى المرض وجه الدكتور وقالهم ان لازم ادخل العناية المركزة لان الضغط عالى وده فى خطورة جامدة وطبعا انا سامعة ولكن مكنتش قادرة اعلق

الا انى اشوف الواد احمد الدموع نازلة انهار من عينيه وماسك ايدى ومش عاوز يسيبنى وهو اللى بيلبسنى الهدوم اللى حانزل بيها

مرة الاقيه راكع عند رجلى ومرة واقف وبيقبل راسى وفى عينيه دموع وخوف وحزن

طبعا موضوع المرض مش اول مرة يحصل كنت احسه وقتها انه متأثر

لكن اول مرة اشوف كل الدموع والحنية دى وفعلا الموقف مش عاوز يروح من دماغى

ربنا يحفظك يااحمد من كل سوء

اما بقى الحدث التانى كان يوم 25-7 من 8 سنوات كان ولادة ابنى مالك اخر العنقود

وبين مالك واحمد عشر سنين طب ليه الفرق ده ؟

ده ليه حكاية طويلة هابقى احكيها لكم فى بوست تانى منفصل ان شاء الله

انا حبيت انى اذكر فى البوست مالك بالمرة علشان يوم ميلاده واقوله

كل سنة وانت طيب

كل سنة وانت منور حياتنا

وبما انك ماكنتش فى الحسبان فبقولك انا مش عارفة ازاى كانت الحياة كان هايبقى لها طعم من غيرك

ومولدك وقصتك من الحاجات اللى الذاكرة مستحيل تنساهم

كل سنة وانت فاكهة حياتنا

وفى النهاية بدعوكم لقراءة موضوعات جميلة جدا وهم

فى مدونة من اجل التمكين

http://fortamkeen.blogspot.com/2009/07/blog-post_13.html

هكذا علمنى رسول الله صلى الله عليه وسلم

http://egyxq8.blogspot.com/2009/07/blog-post_27.html

هعزف لنفسى ( الموضوع فيه عظة كبيرة لينا)

http://ha3zf.blogspot.com/2009/07/blog-post_31.html