جارتى المستشارة

انا قلت ناحذ هدنة من سلسلة الاعداد لها وسنرجع لها قريبا باذن الله

وحقولكم سبب الهدنة انى لاحظت من معظم تعليقات الجزء الثانى وان لم يكن اغلبها

ان فيه خوف ورعب من الموت ورغم انه الحقيقة الوحيدة فى حياتنا

فقلت نهدى الامور شوية فالمقصود التذكير وليس التخويف او التنفير

وعلشان كده قلت احكى لكم على جارتى الحبيبة

وقبل ماادخل فى التفاصيل اقولكم الموضوع من قبل المعرفة بها

منذ ثمانية اعوام فكرنا فى تغيير السكن وده طبعا امر يتطلب البحث والتنقيب

لمدد طويلة حتى نعثر على المطلوب  وبالفعل عثرنا على عمارة كبيرة

من اللى بيطلقوا عليها برج نظرا لارتفاع ادوارها وكثرة شققها

دخلنا واتفرجنا وفعلا عجبتنا قوى

 شقة بالمواصفات اللى احنا عاوزينها ولكن ما جعلنى اقلق  منها هو الشقة اللى جانبها واللى كان على بابها يافطة تحمل اسم المستشار فلان

والقلق كان من ايه ؟

ان احنا واخدين فكرة وطبعا مش من فراغ ان كل من ينتمى الى القضاء والداخلية وما شابه ذلك فى ارتباط شرطى بين الملتزمين وبينهم وده على اللى بنسمعه عن بطشهم وتعاليهم

المهم انا ارفض الشقة وزوجى متمسك بيها ويقولى احنا مالنا احنا هانكون فى حالنا احنا بنعمل ايه يعينى علشان يبقى فيه خوف منهم اقوله مش شرط احنا نعمل بس هم ممكن يعملوا

باءت كل المحاولات بالفشل امام اصرار زوجى ومندوب التسويق الخاص بالعمارة واللى قعد يغرى زوجى بالمزايا اللى فى العمارة واللى يتمناها اى حد يرغب فى السكن المتميز

وتم الانتقال وانا مسيطر عليا القلق والضيق وبدأت اصدر فرمانات لاسرتى

-       ما حدش يعلى صوته

-       ما حدش ينسى باب الشقة مفتوح ولو لحظة

-       نخرج فى هدوء ونرجع فى هدوء

-       ما حدش يسمع لنا حس فى الدخول ولا الخروج

-       حتى الزوار انبه عليهم ما يعملوش حس وهم جايين

 

كل هذا وزوجى والاولاد يتزمرون ويقولوا ليه يعينى فى ايه احنا فين هنا ؟

 

اقولهم هو كده نحرص وخلاص اللى جانبينا مش بيرتحوا للمتلزمين

مر اسبوع على السكن واذا بالباب بيخبط وانا لوحدى فى الشقة

فتحت وجدت سيدة واذا بها تعرفنى بنفسها

انا جارتك المستشارة فلانة فى النيابة (( ياخبر ابيض هى كمان الزوجة مستشارة ))

دخلتها وانا متحفظة فإذا بى اجد سيدة متواضعة جدا وتمتلك روح الدعابة وخفة الدم

ما اعرفش هى اخدت بالها من تحفظى ولا هى عارفة الحاجز اللى بيكون بين الملتزمين وبينهم فكانت بكل جهدها تزيل هذا الحاجز بدون الكلام عنه

والله بعد ربع ساعة بالظبط كنت رجعت لطبيعتى واعصابى ارتحت من الشدة اللى فيها وطالت القاعدة لمدة ساعتين لم اشعر بها من جمال ما دار بيننا من حورارت ما بين الفترة اللى قبل سكنا هنا وكنا فين وبعدين الكلام عن الزواج والاولاد وبعض الامور الخاصة عن العمارة وساكنيها وبعد فترة لما صرحت لها عن خوفى من السكن جنبها قبل ما اعرفها علشان زوجها المستشار ضحكت وقالت لى طب خدى عندك ده العمارة فيها  اعداد كبيرة من لواءات الشرطة والقضاة والمستشارين

بل المفاجأة إن مأمور القسم التابعين له ساكن فى العمارة وانا طبعا لم اعرف هذا لان الانسيسرات لا تعطى مجال لهذه المعرفة

والان وبعد 8 سنوات اقول :

(( أن جارتى هذه من أقرب الناس لى ، بل أقرب لى من اختى الوحيدة وأتحدث لها فى امور لا استطيع التكلم فيها مع احد ، فى السراء أجدها ولو فى اى مناسبة عندنا تكون هى اول المشرفين على المناسبة ، هى فى الضراء اول من يمسح دمعتى واحيانا ادخل عندها وانا مكتأبة وتخرجنى من اكتئابى وهى حتى ما تعرفش سببه ، مريت بظروف مرضية شديدة كان الدكاترة مانعين الزيارة والكلام لم تتركنى لحظة وكانت معى بالمستشفى وتركت شغلها وبيتها وكان من مواقفها الاثر الطيب فى الاسراع بتجاوز فترة المرض بالخير ، فى رحلتى للحج والعمرة وهى الرحلات التى اترك بها الاولاد انا وزوجى ارجع اجدها عاملة مع الاولاد اكثر مما اتخيل ، مواقفها معى كثيرة وكثيرة ومن نعم الله عليا هذه الجارة الحبيبة وزوجها الذى لا يقل عطاءا عنها واللى بقى مع زوجى زى ما هى معايا ،

نسيت اقول إنها بتحترم التزامى جدا بل بدأت من سنوات حفظ القرآن ورتبت جلسة اسبوعية مع بعض نساء العمارة ليتلاقوا فيها بعض الامور الدينية اللى اتعلمتها واللى ربنا يجعلها فى ميزان حسناتها فهى السبب فيها  ..........

 

وفى النهاية لن أجد ما أختم به سوى هذه الكلمات المنقولة :

((ما أجمل أن يكون لديك انسان

يسال عنك ان غبت ........ يقترب منك اذا بعدت

ما أجمل أن يكون لديك فى الدنيا انســــــــــــــــــــــــان

يخاف عليك ..... يحــــــــبك

 

يرعاك ... يشاركك الفرح والسعاده.....والالم

ما أجمل أن تندمج ارواحكم معا .....فتصبحوا قلبا وعقلا واحدا

تفرحون معا.... تحزنون معا ...... وتتألمون معــــا

 

ما أجمل أن يكون لديك انســـــــــــــــــــــــــــــــان

يحسن الظن بك ويغفر لك ان اخطأت .... ويلتمس لك العذر ان له اسأت

 

ما أجمل أن يحفظ غيبتك ... ويدافع عنك... ويقطع لسان من يتكلم عليك

 

ما أجمل أن يكون لديك انســـــــــــــــــــــــــــــان

يشدد من ازرك ان ضعفت

ويشجعك ان جبنت...ينصحك ان اخطأت

 

ما أجمل أن يكون لديك انســـــــــــــــــــــــــــان

كاتما للسر............ .حافظا للعهد

وفيا للوعد ............ ....... صادق اللسان والقلب

 

فاذا كنت تملك هذا الشخص ...... فهنيئا لك به ......... فقد ربحت

فحافظ عليه كعينيك واحمد الله على نعمته عليك

انسان كهذا فى هذا الزمان الذى نعيشه كنز مفقود

اذا وجدته لا تجعله يضيع منك هباء ))