براحتى معاكى وكأنك امى

براحتى معاكى وكأنك امى

حصل موضوع كده من شهرين عاوزة احكى لكم عليه لانه مأثر فيا كثير
هو اللى حصل حصل بس مش عارفة حاسة عاوزة اكلمكم فيه
الموضوع ان لى واحدة صاحبتى ومن اصحابى المقربين بينا تليفونات وزيارات
غابت عنى شوية طلبتها اطمن عليها ردت وصوتها متغير وسألتها مالك يا قدرية
انتى تعبانة ولا ايه بكيت وقالت ياريت تيجى مش حينفع التليفون
قلت لها قدريه طمنينى مش حصبر لما اجى فيه ايه؟
قالت لى اصل هالة غضبانة عندى – هالة ليه؟ - مش حينفع لازم تيجى
لم احتمل نزلت وروحت لها على طول وطوال الطريق هالة غضبانة ياترى ليه ؟
دى عمرها ماحصلت خلال 6 سنين جواز
المهم ياخبر بفلوس- معلش نسيت اقولكم ان هالة ديه بنت قدرية الكبيرة
وصلت المنزل الحزن على الوجوه وفى كل ركن
خير ياجماعة بسرعة قولوا لى ايه اللى حصل ؟ اتكلمى ياهالة فيه ايه ؟
اترمت فى حضنى بتبكى وتقولى موضوع كبير ياطنط
المهم ادخل بيكم على الموضوع اتكلمت هالة وقالت
الاسبوع اللى فات كانت شيماء اختى متعركة مع جوزها علشان
المصروف والفلوس وكل ماتطلب منه حاجة يذلها ويطلع عينها
لما رحت عندها وكانت حالتها وحشة – اقترحت عليها اقتراح انها تاخد من فلوسه على قد ماتقدر من غير مايحس
وتصرف امورها - وتجيب اللى نفسها فيه من غير ما تطلب منه ويذل فيها
وقبل ماقوم عليها علشان نصيحتها السودة ديه لاختها شاورت لى قدرية ان اسمع للاخر
المهم كملى يا هالة اخذت ياطنط قعدتى وروحت على البيت
وسالتنى حماتى عن شيماء واخبارها وانا حكيت لها اللى حصل منى لشيماء
صرخت وقلت لها قلتى لحماتك الاقتراح اللى اقترحتيه على شيماء
قالت لى قلت لها كل اللى دار فى الزيارة
اتنهدت وقلت البنت ديه عبيطة ولا ايه ياقدرية
مش كفاية شورتها السودة لاختها كمان بتحكى لحماتها اكيد مش طبيعية
المهم ماعلينا كملى ياهالة ايه كان رد فعلها على كلامك
قالت وانا بكلمها مكنش لها رد فعل يخوف وردت على اللى قلته
ياخبر عليكى ياهالة دا انتى نصيبة وماوقفتش كثير عند كلمتها
قلتلها كملى يافالحة
جه احمد باليل حضرنا العشا ومفيش اى حاجة كانت باينة عليها
وانا اصلا بينى وبينها حوارات كثير عن زعلها من ولادهاومن حماى
هه جيبى من الاخر ياهالة وبعدين
ثانى يوم ياطنط فوجئت بها لابسة وخارجة ولما سألتها رايحة فين
قالت عند بنتها قلت لها استنى البس واجى معاكى قالت لى لاانا مش حغيب
رجعت حماتى وكانت متغيرة شوية ولما سألتها حصل حاجة عند اميرة
قالت لا انا بس مجهدة شوية ودخلت نامت
جاء احمد قبل ميعاده كالثور الهائج فيه ايه يا أحمد قالى لازم تنزلى دلوقت تروحى عند
اهلك وتبعتيلى عم عبد المنعم وانا اتكلم معاه
يهديك يرضيك لازم تنزلى طب تعالى معايا واتكلم مع بابا فى اللى مزعلك
واللى انا مش عارفة هو ايه؟قالى ابدا لما هو يجى حقوله
قلت لها وحماتك كانت فين قالت لى صحيت بس كانت سكتة
ولما تتكلم تقوله اهدى يابنى ليحصلك حاجة
نزلت ياطنط امام اصراره ولكن تعمدت الا اخد معايا هدوم غير غيار واحد
وانا فى حيرة ياترى ايه اللى حصل منى علشان يعمل احمد كل ده
وصلت عندنا وحكيت اللى حصل ونزل بابا فى ساعتها راح لاحمد
رجع بابا من عندهم حزين حزن الدنيا ولما سالته عرفت اللى حصل
حماتى ذهبت لابنها فى شركته وحكيت له على اللى دار بينا بخصوص شيماء
واحمد خد قرار ان واحدة مبدأها كدة ماتنفعش تكون زوجتى
كنت حاتجنن قلت لها ازاى تقولى لحماتك حاجة زى كده
ردت هالة بكل سذاجة انا اخدت

راحتى معها وكأنها امى

اتدخلت انا طبعا لان الحماة ايضا صديقة لى بس مش صداقة حميمة زى قدرية
لكن راسها والف سيف انها ماترجع هالة تانى دى واحدة ملهاش امان
قلت لها اعتبريها اميرة وغلطت وانتى واحمد لكم كل الترضية لم تفلح وساطتى معها
ذهبت انا وزوجى لاحمد فى شركته بعيد عنها برضه مفيش فايدة
كان رده علينا ان هالة انتهت بالنسبة له تدخل الكثير غيرنا من الاهل والاصحاب والجيران والشيوخ
بدون فايدة وفى الوقت ده وفى محاولة من محاولات الصلح جه ابو هالة من بره وكان تعبان جدا وعلى بال ما جه الدكتور كان حصل انفجار فى المخ ومات وتم الطلاق بين هالة واحمد ورقدت قدرية بعدها والى الان طريحة الفراش
هكذا بكل سهولة انتهت قصة هالة واحمد بعد زواج دام 6 سنين يسبقه علاقة حب سنتين
احمد كان مهندس كمبيوتر وقفت هالة معاه بكل قوتها باعت شقة الزوجية وراحت تعيش مع حماتها
علشان يفتح احمد شركة خاصه به
لما اتاخر الانجاب راحت هالة تعمل الفحصوما ت وكل الاطباء اكد سلامتها ورفض احمد الذهاب لاى
دكتور ولم تعترض هالة وقالت انشاله ماخلفت انا عندى احمد بالدنيا
كانت مع اخواته البنات اخت ثالثة وكان كثير يتنرفز على امه وابوه وهى تصلح بينهم
كثير حماتها كانت تشتكى لها من حماها ومن ولادها وكانت تهون عليها وتخفف عليها
انا عارفة ان هالة غلطانة مش علشان اتكلمت مع حماتها بس ولكن علشان ايضا نصيحتها لاختها
ده اهم حاجة فى اختيار الزوجة انها تحفظ زوجها فى نفسه وماله مش تكون اول واحدة تسرقه
لكن هل تستحق هذه الغلطة هذا الثمن الغالى انها تحمل لقب مطلقة بهذه السرعة
والله هالة وطت على رجل احمد ورجل حماتها تبوسهم علشان لايقع الطلاق
ولم يشفع لها ذلك
زى ماقلت لكم حصل اللى حصل ومن بعدها وانا اردد للبنات اللى معايا فى المسجد
اوالمعارف اوعى تاخدى راحتك قوى مع حماتك وكانها امك
عارفة ان البوست طويل بس كان لازم احكى القصة كلها وربنا يهون علينا جميعا
مايحدث فى هذه الدنيا